තල වල ඖෂධීය බලපෑම්; ක්‍රමානුකූල සමාලෝචනය
Loading...
Files
Date
Journal Title
Journal ISSN
Volume Title
Publisher
Colombo : Sri Lanka Association for the Advancement of Science ,
Abstract
තල යනු ලොව පැරණිතම තෛල අඩංගු බීජ සහිත බෝග වලින් එකකි. එය ලොව පුරා පෝෂණ සංඝටකයක්, ඖෂධයක් මෙන්ම කාර්මික අමුද්‍රව්‍යයක් ලෙස ද භාවිතා වේ. කළු තල, සුදු තල හා රතු තල ලෙස වර්ග තුනකි. තල, ශ්‍රී ලංකාව තුල සාම්ප්‍රදායික වෛද්‍ය ක්‍රමයේ සහ ආයුර්වේද වෛද්‍ය ක්‍රමයේ බහුලව භාවිත වේ. තල දඩු, කොළ, බීජ සහ තෙල් වල ඖෂධීය වටිනාකම් ඇත. 2011 ජනවාරි සිට 2022 මැයි මාසය අතර කාලයේ දී පිළිගත් පර්යේෂණ දත්ත සමූහයන් තුල ප්‍රකාශයට පත්කර ඇති පර්යේෂණ පත්‍රිකා භාවිතා කරමින්, ක්‍රමානුකූල සමාලෝචනයක් සහ විශ්ලේෂණයක් ලෙස, පිළිගත් විද්‍යාත්මක ක්‍රමයක් භාවිතා කරමින් මෙම අධ්‍යයනය සිදුකර ඇත. පර්යේෂණ පත්‍රිකා සෙවීමේ දී සෙවුම් පද භාවිතා කළ අතර ඇතුලත් කිරීමේ හා ඉවත් කිරීමේ නිර්ණායකයන්ට යටත්ව පත්‍රිකා තෝරා ගැනීම සිදුකර පසුව අනුපිටපත් ඉවත් කරන ලදී. තෝරාගත් පත්‍රිකාවන්ගේ සාරාංශ කියවීමෙන් වඩාත් අදාළ ලිපි තෝරා ගැනීමෙන් පසු අවසාන අදියරේ දී සම්පුර්ණ පර්යේෂණ පත්‍රිකා කියවා ඖෂධීය ක්‍රියාකාරිත්වය, නිස්සාරණයේ වර්ගය, ශාකයේ භාවිතා කල කොටස, පර්යේෂණ ක්‍රමවේදය ආදිය ඇතුලත් වන පරිදි දත්ත රැස්කර විශ්ලේෂණය කරන ලදී. ඒ අනුව අවසානයේදී තෝරාගත් ලිපි 30ක් සමාලෝචනය කළ අතර, එයට සායනික පර්යේෂණ 8ක්, සජීවී සෛල තුල සිදුකල පර්යේෂණ 11 ක්, සහ අජීවී පරිසරය තුල සිදු කළ පර්යේෂණ 15 ක් ඇතුළත් විය. තල වල අන්තර්ගත පිළිකා නාශක ක්‍රියාකාරිත්වය, ප්‍රති ඔක්සිකාරක ක්‍රියාකාරීත්වය, ප්‍රති බැක්ටීරියා ක්‍රියාකාරීත්වය, වේදනා නාශක ක්‍රියාව, අසාත්මිකතා නාශක ක්‍රියාකාරීත්වය, ඔසප් රුධිර වහනය ඇති කිරීමේ ක්‍රියාකාරීත්වය, ස්නායු ආරක්ෂක ක්‍රියාකාරිත්වය ආදී ඖෂධීය ක්‍රියාකාරීත්ව රැසක් විද්‍යාත්මකව සනාථ කර තිබෙන බව මෙමගින් තහවුරු විය.
Description
Citation
SLAAS Proceedings of the 78th Annual Session 2022