“කුළුබඩු ලොව රැජින” කහ කුඩු නිශ්පාදන ක්‍රමවල රසායනික ගුණාත්මයේ වෙනස

Abstract

කහ යනු මුළුතැන්ගෙයක ආහාර සකස් කිරීමේදී අත්‍යා වශයම කුළු බඩුවකි. කහ කුළු බඩුවක් ලෙස භාවිතා කිරීම මඟින් කහ අලවල අඩංගු ප්‍රතිඔක්සිකාරක ගුණය හා එහි අඩංගු රසායනික සංයෝග මඟින් හෘද සෞඛය වැඩි දියුණු කිරීම, පිළිකා සෛල වලට එරෙහිව ක්‍රියා කිරීම, මානසික අවපීඩනය අවම කිරීම වැනි බොහොමයක් සෞඛ්‍යමය ප්‍රතිලාභ ලැබේ.

මෑතකදී රජය විසින් කහ ආනයනය සම්පූර්ණයෙන් වැලැක්වීමෙන් පසුව ජනතාව අතර කහ පිළිබඳව වැඩි කතා බහක් ඇති විය. ජනතාව විවිධ ක්‍රම භාවිතා කරමින් කහ කුඩු නිෂ්පාදනය තම නිවෙස් වල දීම සිදු කරන ලදී. නමුත් විද්‍යාත්මකව මෙම ක්‍රම අතර ප්‍රතිඔක්සිකාරක ගුණය හා එහි අඩංගු රසායනික සංයෝග ප්‍රමාණය පරීක්ෂා කර නොමැත.

එමෙන්ම කහ අල, මව් අල හා ඇඟිලි අල ලෙස කාණ්ඩ කල හැක. පැරැන්නන් අතර මව් අල හා ඇඟිලි අල අතර කහ කුඩු නිපදවීමේදී වෙනසක් ඇති බවට මතයක් පැවතුණි. එවන් වකවානුවක පරීක්ෂකයන් කණ්ඩායමක් විසින් සිදු කරන ලද මෙම පර්යේෂණයේ අරමුණ වූයේ විවිධ ක්‍රම මඟින් නිශ්පාදිත කහ කුඩු වල ප්‍රතිඔක්සිකාරක ගුණය හා අඩංගු රසායනික සංයෝග ප්‍රමාණය අධ්‍යනය කිරීමයි. පරීක්ෂණය සඳහා කහ අල ශ්‍රී ලංකාවේ විවිධ කෘෂි පාරසරික ප්‍රදේශ වලින් ලබා ගන්නා ලදී (ගාල්ල, මහනුවර, දිවුලපිටිය හා නිකවැරටිය) මෙම අල මව් හා ඇඟිලි අල වශයෙන් වෙන් කොට ඒවා එකිනෙකට වෙනස් වූ නිෂ්පාදන ක්‍රම තුනක් භාවිතා කර නිශ්පාදනය කරන ලදී. මෙම ක්‍රම වූයේ,

• කහ අල ජලයේ තම්බා ගෙන කැබලි වලට කපා අව්වේ වේලාගෙන කුඩු කර ගැනීම. • කහ අල ජල වාෂ්පයෙන් තම්බාගෙන කැබලි වලට කපා අව්වේ වේලාගෙන කුඩු කර ගැනීම. • තැබීමකින් තොරව කහ අල කැබලි වලට කපා අව්වේ වේලාගෙන කුඩු කර ගැනීම

පර්යේෂණයේ අවසන් නිගමනය වූයේ ප්‍රතිඔක්සිකාරක ගුණය අතින් හා අඩංගු රසායනික සංඝටක ප්‍රමාණය අතින් ඉහත ක්‍රම තුන අතරත්, මව් අල හා ඇඟිලි අල අතරත් කිසිදු වෙනසක් නොමැති බවයි. එමගින් ගම්‍ය වන්නේ ඉහත ඕනෑම ආකාරයක කහ කුඩු නිෂ්පාදන ක්‍රමයන්ගෙන් ඖෂධීය ගුණයෙන් නොවෙනස් කහ කුඩු නිෂ්පාදන සිදු කළ හැකි බවයි.