මී පැණිවල පරාග කණිකා අධ්‍යයනය තුලින් මී පැණිවල නිශ්චිත කෘෂි පාරිසරික කලාප හඳුනාගත හැකිද?

Abstract

මී පැණි යනු මී මැසි ගෝචර ශාකවල පුෂ්ප වලින් ලබාගන්නා මල් පැණි හා පරාග කණිකා මී මැස්සාගේ ඛේටයේ ඇති ශ්‍රාවයන් මගින් පැණි බවට පරිවර්තනය කරන සංකීර්ණ ක්‍රියාවලියක ප්‍රතිඵලයකි. එම නිසා මී පැණිවල ගුණාත්මය ප්‍රධාන වශයෙන් රඳා පවතිනුයේ මී පැණි සෑදීමට ගන්නා පුෂ්පවල ඇති පරාග හා මල් පැණිවල ගුණාත්වය මතය. ජාත්‍යන්තර වශයෙන් මී පැණිවල ගුණාත්මය මනින ප්‍රධාන සංඝටකය ලෙස පරාග කනිකාවල සුලභත්වය හා පරාග ඛණිකා ලබාගත් ශාකවල විවිධත්වය සලකා බලනු ලබයි. තවද යම් පාරිසරික කලාපයක ඇති ශාකවල විවිධත්වය හා පරාග සුලභත්වය වැඩිනම් එම ප්‍රදේශයෙන් ලබාගන්නා මී පැණිවල ගුණාත්මක අගය වැඩි මට්ටමක පවතී. ලංකාවේ කෘෂි පාරිසරික කලාප 46 ක් පැවතියද ඒ එක් එක් ප්‍රදේශවල නිපදවන මී පැණිවල ඇති පරාග සුලභත්වය හා විවිධත්වය ගැන සිදුකර ඇති පරීක්ෂණ අල්ප මට්ටමක පවතී.

එම නිසා ශ්‍රී ලංකාවේ ඇති ප්‍රධාන කෘෂි දේශගුණික කලාප හතරකින් (උඩරට, අතර මැදි කලාපය, උඩරට තෙත් කලාපය, පහතරට අතරමැදි කලාපය හා පහතරට වියළි කලාපය) ලබාගත් මී පැණි සාම්පල, ඒවායේ ඇති පරාග කණිකා සුලභතාවය හා ශාක විවිධත්වය සඳහා පරීක්ෂණ සිදු කරන ලදී. එහිදී අනාවරණය වූයේ පහතරට හා උඩරට අතර මැදි කලාප වලින් ලබාගත් මී පැණිවල පරාග ඛණිකා සුලභත්වය හා ශාක විවිධත්වය ඉහල අගයක පවතින අතර උඩරට තෙත් කලාපයේ සාපේක්ෂව අඩු මට්ටමක පැවතීමයි. තවද පරාග කණිකා විශ්ලේෂණය කිරීමේදී හෙළි වූයේ පහතරට අතරමැදි හා වියළි කලාප වලින් ලබාගත් සාම්පල වල ඒ ප්‍රදේශයේ බහුලව ඇති මී මැසි ගෝචර ශාක විශේෂ 30 කට වැඩි ප්‍රමාණයක පරාග කණිකා එම මී පැණිවල අඩංගු වී ඇති බවයි. මෙයින් පැහැදිලි වනුයේ මී පැණිවල පරාග කණිකා සංයුතිය අධ්‍යයනය කිරීම තුලින් මී පැණි ලබාගත් නිශ්චිත කෘෂි දේශගුණික කලාප හඳුනාගත හැකි බවයි.